Ata do të jenë në mbajtje edhe për 48 orë të tjera, deri në marrjen e vendimit nëse do t’u caktohet masa e paraburgimit ose jo, kërkesë kjo e bërë nga prokurori Haki Gecaj.

Avokati i imamit Enis Rama, Mahmut Halimi, tha se nuk është asnjë fakt që klientit të tij t’i caktohet masa e paraburgimit, ndaj shpreson që gjyqtari nuk do ta aprovojë kërkesën e kryeprokurorit.

Imami i Xhamisë së Madhe në Prishtinë, Shefqet Krasniqi, dyshohet se ka shpëlarë qindra-mijëra euro. Ai, sipas fletarrestimit, të cilin e ka parë KTV-ja, thuhet të ketë pranuar fonde nga organizata të ndryshme, në mesin e tyre edhe atë al-Haramain, organizatë e lidhur me al-Qaedan.

Një pjesë e madhe e fondeve që ka pranuar Krasniqi kanë përfunduar në llogarinë e NTP “Portat”, biznes i regjistruar në emër të imamit Krasniqi. E pika tjetër për çka dyshohet Krasniqi është edhe nxitja e urrejtjes, më saktë, nxitjes së të rinjve për t’iu bashkangjitur organizatës terroriste ISIS, derisa avokati i tij, Bajram Tmava, mohon veprat për çka dyshohet klienti i tij.

KTV-ja gjithashtu ka marrë vesh se këto ditë është intervistuar në zyrat e tij edhe kreu i BIK-ut, Naim Tërnava, derisa me Policinë e Kosovës janë duke bashkëpunuar ngushtë edhe familjarët e personave që kanë ose i kishin të afërmit në Siri.

Në anën tjetër, Kryesia e Bashkësisë Islame pas një mbledhje ka lëshuar një komunikatë për media ku thuhet se "Bashkësia Islame e Kosovës punën dhe aktivitetin e vetë e bazon në parimet hyjnore islame”, andaj ata besojnë se edhe “ligjërimet e imamëve në xhamitë tona janë zhvilluar në këtë frymë”.

“Kryesia e Bashkësisë Islame të Kosovës, beson në pafajësinë e tyre përderisa organet e drejtësisë nuk e dëshmojnë të kundërtën”, thuhet në kumtesën e tyre.

“E ripërsërisim nuk prejudikojmë fajësinë, po në të njëjtët kohë jemi kundër fushatës që demonizon institucionin e imamit dhe xhamive pa fol drejtësia. Andaj edhe njëherë apelojmë që të presim të japin verdiktin organeve të drejtësisë. Ftojmë dhe apelojmë tek të gjithë qytetarët, e posaçërisht besimtarët tanë, që me qetësi e maturi të presin vendimin e organeve të drejtësisë, larg çdo politizimi e polarizimi, tendence e keqkuptimi”.

BIK deklaron se kontributi më i mirë për vendin, shtetin dhe fenë tonë, në këtë situatë të krijuar, është qetësia dhe besimi në institucionet e vendit.

“Populli ynë është shquar për urtësi, mirëkuptim, maturi e pjekuri, respekt dhe përkrahje për tjetrin, virtyte e vlera këto që duhet të reflektojnë dhe të na shoqërojnë edhe në këto momente. Zoti e do paqen dhe njerëzit që e kultivojnë dhe angazhohen për të”! /Lajme24.ORG